| |
Стих первый.
Хвалим вас пресвятые ангели, служители Живоначальное Тройцы, стражеве душ наших, предстояще всегда страшному Престолу Божественному, молитеся за нас да подаст нам на земли мир, и по смерти царство небесное.
Стих второй.
Великославный архангеле Михаиле со всеми небесными силами поразивый безчисленые тьмы сатонины, прийди напомощь людем веры Христовы, и порази нелютостивыя поганы, да воспоем вам песнь победную купно Алилуия.
Стих третий.
Стражеве вселенное царств градов и человеков, утвердите царей христианских, соблюдите грады верных, споможите нас грешных, о Вас убо речено есть яко ангелом своим заповеда о нас сохранити нас во всех путех наших, темже и дерзнухом сие пение приносити Вам.
Слава Отцу и Сыну и Святому Духу.
Ангели и Архангели, начала силы, власти престоли, царствия херувим и серафим. Вас слышал пророк вопиющих на небесех Свят Свят Свят Господь Саваоф. Мы же на земли суще Вашими молитвами да избавимся грехов и похвалим неразделимую и живоначальную Троицу.
И ныне и присно и во веки веков. Аминь.
Пресвяты ангеле добрый хранителю души моея от Бога уставленный, тебе наипаче молюся плоть мою нескверну во дни и в нощи соблюди, невидимых врагов Божиею силою отжени и по смерти грешную душу мою в царство Божие введи.
Кондак первый.
Архангелу Михаилу, и всем небесным чином песни приносим, они убо нас от скорби всегда избавляют, сего ради и хвалимся архистратиже, со всеми духи святыми, Господу Вседержителю служащими Вы бо предстоящии святыни Его от всяких нас бед свободите, да возопием купно с Вами Аллилуия.
Икос первый.
Ангел предстатель огненным чином Ты еси Михаиле начальниче, Божественным блистая светом, озаряеши всех с любовию поющих Тебе сице:
Радуйся звездо мира светоносная, радуйся свеще закону светозарная.
Радуйся губительных бесов падение, радуйся согрешающих людей возведение.
Радуйся свете непостижимый Божественыма помыслома, радуся зоре дивовидимая человеческими очима.
Радуйся Ты убо есть наставник спасению, радуйся приводя сердца ко стешению.
Радуйся радости верным подателю, радуйся от клятвы нас изводителю.
Радуйся яко Тобою мысль просвещается, радуйся яко Тобою печаль отгоняется.
Радуйся Архистратиже Михаиле, со всеми силами небесными!
Кондак второй
Видяще Твою красоту пресветлую Архангеле Божий, вси земнии дивимся преславный убо Твой образ непостижим нам и дивен является, невещественному Божеству всегда предстоящ зова Аллилуия.
Икос второй.
Разум даруй нам Божественный, Михаиле начальниче, и всех предстателю чинов из уст наших скверных якобы мощно Твоему пету имени, да к Тебе молебные стихи приносим, глаголюще:
Радуйся страшного видения княже, радуйся многия светлости исполнение.
Радуйся Божественных заповедей похваление, радуйся христоименитых мудростей глаголание.
Радуйся разум безчислен подавающи людем, радуйся здравие пречудное уделяющи верным.
Радуйся ангелов преславным воеводо, радуйся демоном претяжкая бедо.
Радуйся светлейши света солнечного, радуйся озарение огня божественного.
Радуйся смутным потешение и радость, радуйся слепым хожение и светлость.
Радуйся Архистратиже Михаиле, со всеми силами небесными!
Кондак третий.
Силу свыше пошли нам Михаиле Архангеле, поющим образ страшного вида Твоего светоносного, небозарного и огненного, тем убо неверных попаляеши, верным же сердца просвещаеши, яко да поют ко Богу Аллилуия.
Икос третий.
Имать Тебе мир весь, заступника великого и дивна помощника во бранех, сего ради яко поборника верна, и скораго предстоятеля, пресвяте Михаиле чтем мы тя, и Твоей памяти дары приносим таковые глаголюще:
Радуйся мудрых самотворче повеленией, радуйся Божиих объявителю сведенией.
Радуйся врагов Христовы веры разрушителю, радуйся прелестников нашего естества губителю.
Радуйся яко ко Господу молишися за нас, радуйся яко мучителей отгоняеши от нас.
Радуйся освещая благочестивых помышления, радуйся отдаляй жадости злобивыя.
Радуйся недугующих заступниче скорый, радуйся Христов бисере драгий.
Радуйся Тобою убо мир просветися, радуйся ибо тобою лесть прогнася.
Радуйся Архистратиже Михаиле, со всеми силами небесными!
Кондак четвертый.
От бури всякое избави нас, ангельски князе Михаиле, иже с любовию и радосте пресветлую Твою память совершаемо, яко великаго в бедех защитника, и при смерти от злых духов обранителя всех вопиющих ко Богу Аллилуия.
Икос четвертый.
Яко солнце сияеши посреди Божественных ангелов, пречудный Михаиле, небеснаго двора начальниче, к Тебе по Бозе прибегаем, очисти прослави и освяти всех, тебе таковая поющих:
Радуйся, света незаходимаго светиле, радуйся огня невещественнаго престоле.
Радуйся скорбящим душам потешение, радуйся трудом земным спасение.
Радуйся ассириян умертвивый дивнообразно, радуйся иудеян наставивый преславно.
Радуйся столпе огненосный ангелом радование, радуйся ограде богосадный человеком красование.
Радуйся звездо звездам светлейши, радуйся светильниче всякого злата чистейши.
Радуйся врачу болезнем многим, радуйся подателю разума глупым.
Радуйся Архистратиже Михаиле, со всеми силами небесными!
Кондак пятый.
Хотяй избавити от лести земныя человеки, архангеле и начальниче огненным чином, умножил еси в мире источник чудес пресветлых, и всех обогатил еси Божественым разумом вопиющих Аллилуия.
Икос пятый.
Видевше сынове человестии огнеобразную Твою красоту, всю тварь просвещающу архипрестольниче Михаиле, подщахуся песньми воспети пресветлую память Твою, и возопити к Тебе таковая:
Радуйся светлый Христов предстателю, радуйся щедрый и скорый подателю.
Радуйся лекарю немощным пречудный, радуйся губителю бесом престрашный.
Радуйся красото неизреченная церкви Христовы, радуйся место пречистое благодати Иисусовы.
Радуйся многославная сило чудесем, радуйся многожелаемый даре радованием.
Радуйся чистое духовное сокровище, радуйся светлое добродетели приятелище.
Радуйся славных мучеников укрепителю, радуйся честных иереев просветителю.
Радуйся Архистратиже Михаиле, со всеми силами небесными!
Кондак шестой.
Красоту Твою преславную яко узрел Маное исполнися скорби, яко земен унывая и вжасен быв удивися, неразуме бо яко безплотен пребываеши, и со земными смешаешися, услышав же от Тебе о зачатии Самсонове возопи Аллилуия.
Икос шестой.
Разрешити ремень ногу своею, яко рекл еси Михаиле воеводо силы Господни, ко Исусу Навину на поли Ерихонстем, вжасеся удивляяся велми, и паде при ногу Твоею, славяще тебе и поя Тебе сице:
Радуйся оружие державное царем добреучтивым, радуйся сердце смелое воином послушлывым.
Радуйся правоверным победа известная, радуйся хвалящим Тя уста честная.
Радуйся пророком славное похваление, радуйся постников сладкое воздержание.
Радуйся добродетели необоримый столпе, радуйся церкви неугасимый светиле.
Радуйся богатство кротким и смиренным, радуйся наставниче заблудшим человеком.
Радуйся каменю светлый и многоценный, радуся бисере драгий и безценный.
Радуйся Архистратиже Михаиле, со всеми силами небесными!
Кондак седьмой.
Велика имать Тя мир заступника и поборителя и столпа крепка, якоже явлено есть Даниилу пророку, Михаиле первый княже ангельский, Ты убо соблюдаеши царства земная, и посекаеши царей несправедливых, тем же и мы ведяще сия с радостию вопием Богу Аллилуия!
Икос седьмой.
Новыя чуда показа нам Тобою на земли, всех чудотворец владыка, архихерувиме Михаиле, всякие бо силы бесовские воспращаеши, и нам в бедах спомогаеши сего ради приносим таковая вопиюще:
Радуйся радости Божия подателю, радуйся клятвы работныя губителю.
Радуйся просвещение святым и похваление, радуйся сладкости правоверным изглаголание.
Радуйся шипок багряноокрашен тайного обоняния, радуйся миро добровонно Христова благоухания.
Радуйся, яко укрепляеши мудростию добродушие, радуйся яко просвещаеши светлостию благочестие.
Радуйся земным ограждение и хранителю, радуйся верным лествице и возводителю.
Радуйся тобою убо обновляются долины, радуйся и с Тобою покланяются горняя.
Радуйся Архистратиже Михаиле, со всеми силами небесными!
Кондак восьмой.
Чудное видение Твое яко виде Аввакум, егоже изнесл еси препрыткий ангеле божий, из Юдеи в Вавилон, дати пищу Даниилу во рове со львы седящему, тойже виде превеликое чудо Твое возопи с верными к Богу Аллилуия!
Икос восьмой.
Весь Ты во бранех крепкий хранитель присный воеводо Михаиле, слава царем и держава, Твоим убо заступлением вернии побеждают вся полки, и к Тебе согласно вопиют:
Радуйся верным Божий венчателю, радуйся грехом страшный губителю.
Радуйся честный владычний сосуде, радуйся Богом саженнаго раю ограде.
Радуся светлое Христово пение, радуся добропристойное место жизни вечное.
Радуйся яко возращаеши плод чистоты, радуйся яко точиши течение мудрости.
Радуся садом насадителю безсмертным, радуйся летораслем делателю нетленным.
Радуйся Тобою убо пламень в пещи угасися, радуйся и Тобою отроцы спасени быша.
Радуйся Архистратиже Михаиле, со всеми силами небесными!
Кондак девятый.
Всяко естество человеческое удивися страшному Твоему чуду, яко единое нощи убил еси сто тысещей, осмь десят тысещей, и пять тысещей Богу противляющихся, пресильный воеводо Михаиле, темже избавившиися из рук вражиих вопияху к Богу Аллилуия!
Икос девятый.
Зряй Тебе царь и пророк Давид Ангеле Божий престрашный, у гумна ареунова евузейскаго сооружением стояща ужасеся дивнаго Твоего образа, людие же избавльшиися от умертвления вопияху к Тебе таковая:
Радуйся душам врачу правый и телом, радуйся всем первоначальниче ангелам.
Радуйся советов Божиих таителю, радуйся тли первозданных разрушителю.
Радуйся будущия разумы даруя, радуйся приходящие язвы отдаляя.
Радуйся ограде и крепость благочестивым, радуйся защитниче и твердость правоверным.
Радуйся любослышание красного пения, радуйся сладкое втешение добродушия.
Радуйся яко просвещаеши очи сердечные, радуйся яко омрачаеши помыслы злобные.
Радуйся Архистратиже Михаиле, со всеми силами небесными!
Кондак десятый.
Сохрани святе от всякия нужды ко пресветлому Твоему притекающих покрову и светоносное Твое празднующе торжество, начальник убо ангелом Божиим Михаиле Ты еси, и можеши помагати во крепосте с любовию поющих Богу Аллилуия!
Икос десятый.
Стена еси человеком Михаиле архипосле, и столп крепок во бранех, Твоим убо сильным заступлением побеждаются вражии полки, мы же спасаеми вопием к Тебе таковая:
Радуйся земным сильный предстателю, радуйся врагом дивный прогонителю.
Радуйся супротивных гордость побеждая, радуйся советы тайныя даруя.
Радуйся крине преясный добровония Божественнаго, радуйся цвете неувядаемый обоняния тайнаго.
Радуйся яко точиши потоки чудесем, радуйся яко подаеши благодати просящим.
Радуйся людям законным наставителю, радуйся престолу Божию служителю.
Радуйся яко хромым крепость истечение, радуйся слепым светлость извождение.
Радуйся Архистратиже Михаиле, со всеми силами небесными!
Кондак одиннадцатый.
Пение всякое земное побеждается, Михаиле пресветлый служителю Господень, для множества чудес Твоих, повсядневныя бо молитвы аще приносим Тебе, ничтоже чиним достойно противо тому еже даруеши всем поющим Богу Аллилуия!
Икос одиннадцатый.
Светоносный Божий предстателю Михаиле, страшным огненным чином первоначальниче, просвяти и озари сердца наша любовию приносящая ти моления гласы таковыми:
Радуйся нищим и вдовам заступниче, радуйся многим недужным наставниче.
Радуйся скорбящим радость и потешение, радуйся путьшествующим крайнее отпочинение.
Радуйся преславное врачевание благочестивым, радуйся великое украшение верным.
Радуйся яко болящим исцелитель явися, радуйся яко плавающим правитель показася.
Радуйся отмыкая место пищи безсмертныя, радуйся подая дар жизни вечныя.
Радуйся браздо с садовнем цветоносным, радуйся корене летораслем неувядаемым.
Радуйся Архистратиже Михаиле, со всеми силами небесными!
Кондак двенадцатый.
Благодать святе божественную с небесе подай, Твоим Михаиле Архангеле песнословцем, яко столп убо огненный верныя просвещаеши, попаляеши же не поющих во святей церкви Твоей Аллилуия!
Икос двенадцатый.
Поюще Тебе земнии, просвещаются Твоим светом, яко Божественный убо владычей красный рай, Михаиле пресвяте благоухаеши, и освещаеши вопиющих к Тебе Таковая:
Радуйся светлая полатам высото, радуйся честная пастырем красото.
Радуйся маргарите драгий и многоценный, радуйся богатству источниче обильный.
Радуся диво велелюбимое ангелом и человеком, радуйся имя преславное пророком и мучеником.
Радуйся яко избавляеши от соузов пленники, радуйся яко побеждаеши верных супротивники.
Радуйся обраняяй людей Христовых, радуйся укрепляяй царей православных.
Радуйся телес наших известный хранителю, радуйся душ наших на небо возводителю.
Радуйся Архистратиже Михаиле, со всеми силами небесными!
Кондак тринадцатый.
О пресладкий свете Михаиле Архангеле, четверосветимая небу красото, всех врагов наших видимых, и невидимых отгонителю, нынешнее сие приношение приими, и от всяких нас бед избави, и всех врагов духовных и телесных Тебе данною от Бога силою отжени, и вечного огня изорви всех поющих Аллилуия!
Молитва набожная
святому ангелу хранителю своему.
Всемогий превечный Боже, сотворивый ангелы своя духи, и слуги своя огнь палящь, им же и дал еси место вышнее, дабы всегда видели лице Твое, дух сый, хотя от духов похвален быти, любовь сый, восхоте от них любовь познати, но сатона непокорливый не хотяй чти дати сотворителю своему, бо гордости запален, со всеми приставшими к нему, пожадал престола полунощнаго. Сего видел еси Христе, яко молнию з неба падающа. Потом животная и телесная неразумная на земли в мори и по воздуху, дабы познана была превеликая мудрость и невымовная доброта твоя створил есь наипоследы создал еси человека, по образу своему и подобию, дабы наполнил место сатоны спадшего, подобна ангелом душею, и животным плотию. Сего умалил малым чим от ангел славою и честью венчал его, вся звери рыбы и птице покорил под нозе его, и ктому ангелом своим завещал о нем, дабы всегда стерегли его. Якоже сам глаголал есь к Моисею рабу своему: се аз посылаю ангела моего пред тобою он же предойдет тебе, и сохранит тя на пути, в введет тя в место еже уготових тебе, соблюди того, и послухай гласа его, не погорди им и не отпустит убо внегда согрешати, несть имя мое в нем.
Господи царю и содетелю всякого сотворения, для таковых превеликих и неизреченных доброт Твоих еже вчинил еси роду человеческому, недостойные молитвы наши приими. И якоже сам заповедал еси нам во почтивости имети ангела своего, споможи нас превеликою ласкою своею, да быхом а ни словом а ни делом а ни помышлением супротивлялися воли Твоей, и стражеви души нашея и телу. И отпусти нам грехи наша, и подай нам жалость сердечную о беззакониях наших, много бо радуются ангели твои светлые о едином грешнике кающемся, тебе же светлый хранителю мой прошу приими от мене молитву сию, и соблюди мя и навчи мя и исправи мя, во всяких делех моих, ты бо всегда видиши лице Божие и стережеши души моея и тела, того моли да введет мя во царство свое с тобою вкупе во веки веков. Аминь.
| |
